Sanad kadib ciidamada AMISOM oo saldhigyo kala wareegayaa ciidamada Itoobiya ee Baydhabo

Sabti, 26-01-2013  -- Ciidamada midowgga Africa AMISOM ee gobollka Bay gaar ahaan magaalada Baydhabo ku sugan ayaa hadda mudo sanad ah kadib u diyaar garoobaya sidii ay saldhigyada ugala wareegi lahaayeen ciidamada Itoobiya.

Inta badan hadda saldhigayada ciidamada magaalada Baydhabo waxaa ku sugan oo ka howlgala ciidamo Itoobiyaan ah, iyadoo meelo kooban oo kaliya ay ka joogaan magaalada ciidamada AMISOM.

Ciidamada AMISOM ee ku sugan magaalada Baydhabo oo isugu jira Uganda iyo Burundi ayaa gaaraya ilaa 800 oo askari, kuwaasoo loo qorsheeyay in ay la wareegeen nabad-galyada magaalada Baydhabo.

Marka la eego howlgalka AMISOM ee gobollada Bay iyo Bakool waxaa la leeyahay waxaa loo qorsheeyay ciidamo gaaraya ilaa 2, 500 oo askari kuwaasoo ka kala socda dalka Uganda iyo Burundi.

Dhowaan ayay aheyd markii garoonka diyaaradaha Baydhabo ay la wareegeen ciidamada AMISOM, waxaana garoonka ka socda howlo dib loogu dhisayo, maalin walbana waxaa ka soo dega diyaarado sahay u sida ciidamada.